Ola de novo! Isto é un anuncio de reapertura.
Esta fin de semana abrimos segundo o horario de costume e, durante a semana de festas que vén, estaremos abertos todos os días a mediodía e damos mesa con reserva previa pola noite. Podedes ir chamando: 986-862-275.
Aquí unha fotiño das verduras ecolóxicas recén traídas do Alcoubo de Zacande para conquistarvos. E vaia por diante que a estes produtos as fotos nunca lles fan xustiza.
Continúa a programación de actividades co comezo das clases de danza africana, dende este mes de marzo. Serán impartidas por Cristina Malvárez de Biomesturas Danza, que xa é coma unha persoa máis da casa, e terán lugar os luns entre as 20:30 e as 22:00. Para iniciarvos e convidarvos a vir, amais, dámosvos toda a facilidade, comezando cun taller promocional (luns 10) para probedes e decidades se vos gusta este tipo de baile, e para o que a achega económica será voluntaria: a que vós queirades.
Agora, vedes que nas publicacións que facemos aquí para presentar as cousiñas que programamos gústanos suxerir onde pode radicar o seu interese ou que clase de emocións pode provocar. Porén, Cristina pasounos un texto que ela xa tiña preparado, e que transmite todo iso moito mellor do que o saberiamos facer nós. Para saber realmente que vos pode aportar aprender esta danza recomendámosvos lelo a continuación: Modalidad danza africana.
Polo demais, toda a información que precisedes podédela obter chamando ao teléfono de Cristina que vedes aquí enriba no cartel (658937556), ou ao noso de sempre (986862275).
Unha aperta e a seguir inventando!
Haberá moitos e moitas de vós que dende a fin de semana que vén teredes pensado poñer o disfraz e saír á rúa a deixarvos levar, non si? E seguramente causar impresión e protagonizar algún momento estelar da festa! Para iso non está de máis engadir ao talento e ao encanto persoais, algo de preparación e algúns pasos novos. O Entroido é unha festa para gustarse, así que hai que sacudir o medo ao ridículo como sexa.
Pensando nisto, á profe Cristina ocorréuselle que sería unha boa idea dar unhas poucas leccións do que ela domina, os bailes latinos (amais da danza africana, que axiña tamén programaremos..), antes mesmo das datas clave. Durante unha hora e media longa axudaranos a poñer o pé de entrada na samba, na bachata, no merengue… Podedes ver os detalles aquí debaixo, no cartel que preparamos. Tamén é unha boa oportunidade para saber se vos prestaría apuntarvos a unhas clases de baile regulares, no? As cousas hai probalas.
Amais tedes que saber que, como nos gusta facer as cousas en condicións, temos espellos novos na parede. Xa somos case unha humilde escola de danza! Francisco e o seu alumnado xa os estiveron a utilizar nas clases de flamenco, das que podedes ver algunha foto no noso Facebook.
Apuntádevos!
Hoxe presentamos a primeira novidade do ano. Fainos ilusión porque é unha iniciativa chegada de fóra, que parte do interese dunha amiga da Casa chamada África, á que puidemos dar lugar cun chisquiño de coordinación: mentres nós contactabamos con Francisco, (gaditano e profesional do flamenco dende hai moitos anos) para dar a clase, ela ía xuntando o grupiño de alumn@s. E sen moito máis, conseguimos así programar as primeiras clases de danza.
O grupo comezará o primeiro martes de febreiro e aínda hai sitio se vos animades. Botade un ollo ao cartel. Se queredes máis información, podedes chamar ao noso número ou ao de Francisco, que figura ao pé da imaxe. Saúdos!
Non se sabe o que pode pasar. Mellorar tal e como están as cousas non é difícil, pero tamén é certo que para os que gobernan o listón dos desastres parece non estar nunca o suficientemente alto; siguen saltándoo e mellorando a súa marca día a día. Pero, sexa como for e veña como veña dende fóra, en cada ano que comeza tamén hai unha parte moi importante de determinación persoal, de punto de vista. Pódese tomar ata coma un xogo. Imaxinade que o 2014 é un anaco de plastilina: que forma lle damos?
A nós ocorréusenos mirar 0 2014 coma un globo, un globo aerostático. Humilde, enxeñoso, lixeiro, colorido, viaxeiro e que se eleva polo aire e suca as nubes (e os nubarróns tamén como pode). E a festa para rematar este no que estamos, pois acorde con esa idea. Vale un pouco todo: podedes pinchar vós mesm@s a música que vos guste, traer instrumentos dende a guitarra á botella de anís, vir de gala ou de paisano…
Estaremos dende as 01:15 ata… Ben, ata cando nos pareza. Mirade que as 50 primeiras entradas van saír máis baratas, así que ide matinando para mercar dende luns. Barra libre e chocolate matutino a pouco prezo.
Para o que precisedes, os contactos habituais: acasadeana@gmail.com // 986862275
Felices festas a todas e todos!
Dispoñendo dunha casa antiga desas que ás veces provocan ruídos estraños e vendo que o de celebrarmos festas nas vésperas de festivo comezou a convertérsenos nun costume sen sequera planealo de antemán, parecía claro que era momento de poñernos a tallar cabazas e preparar un Samaín para o vindeiro día 31 de Outubro.
Somos restaurante e somos local de cultura, e por iso volvemos propoñer un “plan total“. Isto significa que poñemos á venda un tique por 15 euros e con iso estaredes a mercar unha cea-buffet con menú de tempada, a primeira copa ou mojito da noite e a entrada para o concerto que nos ofrecerán Xandre e Caie, músicos moi tradicionais e moi vanguardistas, ben rodados e recoñecidos (1º premio musical no certame Xuventude Crea 2012) que forman A máquina de meter medo. Axeitado, ou non?
O horario aproximado para esa noite será o seguinte:
– 21:30-22:00 –> Apertura e recepcións.
– 22:30 –> Servizo da cea.
– 23:30 –> Concerto de “A máquina de meter medo”
– Peche ás 03:00.
Amais, no necesario descanso dos músicos, leremos o conxuro da queimada para espantar os malos espíritos e repartiremos groliños entre todos, coma os costumes da data esixen.
Podedes reservar os tiques poñéndovos en contacto connosco nos teléfonos e correos electrónicos habituais : acasadeana@gmail.com, 986862275, 639369940.
Ah! E animádevos a poñer un disfrace! Veña, que aos que veñades ataviados convidámosvos a algo máis.
Mouchos, coruxas, sapos e bruxas…
Ola! Xa abrimos a venda de tiques, para que poidades deixar feita a transacción dende a casa e nun par de minutos. Só tedes que seguir estes dous pasos:
1. Elixide o tique que desexades, abride unha conta na plataforma de pago introducindo os vosos datos e mercádeo.
2. Enchede o formulario que se atopa na parte baixa desta entrada co voso nome e correo.
Despois de facer iso, nós enviarémosvos un tique identificado cun número de serie específico ao voso correo e non teredes máis que imprimilo. Xa está!
Entrada sinxela festa (15€):
Entrada clase de baile sinxela (10€):
Entrada festa + clase de baile (20€):
Ola a todos!
Tedes que desculpar que durante este último mes a páxina nos quedase desatendida. Limitámonos a manter actualizada a páxina do Facebook, por unha simple cuestión de popularidade e de economía temporal, e quedounos atrás o traballo nesta bitácora. Por se acaso aproveitamos para suxerir que, aqueles que teñades perfil nesa rede social pero aínda non nos sigades, comecedes a facelo agora. Para os que non teñades perfil ningún, facemos un resumo.
A Festa Cubana do pasado 24 de Xullo foi un éxito. Había unha concordancia xeral en que a cea estaba moi boa, que o concerto saíu moi ben e que tanto os/as que saíron á pista de baile como os/as que preferiron mirar gozaron moito do ambiente. Temos un álbum de fotos que o proba (grazas sobre todo á nosa amiga Marta) e tamén un pequeno vídeo. Pasade pola galería e mirade!
Despois diso, aínda houbo máis. O 25 de Agosto pasado, domingo pola tardiña, organizamos o noso primeiro concerto ao aire libre no xardín. Os que tocaron foron Samsara, bos amigos da Casa dende hai tempo. Eles non só puxeron decibelios, senón tamén moi boas vibracións, e todos quedamos encantados coa boa acústica que se recollía alí detrás. Amais diso, ao remataren puxeron os instrumentos e o equipo a disposición dos espontáneos e tivemos unha pequena e moi divertida “jam session”, non só con música, senón tamén con poesía. As fotos deste día, que tamén podedes atopar na galería, foron por cortesía de Helena (se queredes contratar a algunha fotógrafa non tedes máis que pedir referencias, eh?). E o cartel foi este, para que vexades que non é bóla.
En fin, que non queremos poñer pausa! Dentro de pouco máis cousas. Unha aperta a todas e a todos.
Asuca’!
O mércores 24 de Xullo, véspera de festivo, como está a facer bo tempo pero o traballo non nos deixa baixar demasiado á praia, ímonos poñer caribeños na propia Casa. Que non se diga…!
Para comezar imos coller algúns ingredientes exóticos, inventar con eles unhas bonitas filigranas culinarias e presentarvos un menú degustación de gastronomía cubana que vos sorprenderá mentres tamén vos deixa pertinentemente saciados (Mojito incluido).
Logo chamaremos a un grupo de experimentados músicos nativos chamado SonReal para que dea un concerto en directo e nos arrebate a todos entre salsas e boleros.
Máis aínda, os que cheguemos un pouco perdidos e non saibamos moito de bailar teremos á nosa disposición a Cristina (da escola Mesturas Danza), para que nos anime e nos ensine uns pequenos pasos cos que aguantar o tipo no medio da pista.
E todo isto, entre decoracións tropicais e a calor estival, dá como resultado un ambiente coma o que se percibe na parte de abaixo do noso carteliño, só que con menor moreno de pel:
Este será o horario aproximado das actividades:
21:00 — Clase de ritmos latinos previa á actuación.
22:00 — Servizo de cátering e coctelería de mojitos
23:00 — Comezo da actuación en directo.
01:00 — Sesión de pinchadiscos ata o remate.
E toda esta oferta por 15€, xa vedes. Para conseguir os vosos tickets podedes mercalos aquí no restaurante directamente ou ben reservárnolos por teléfono/correo e facer o pagamento por ingreso en conta bancaria (Banesto 0030 6085 96 0387024273). Aos que decidades vir pedímosvos que non agardades ata o último momento para mercar a vosa entrada, posto que levando un cálculo anticipado de asistentes sempre nos é moito máis fácil planificar os labores de cociña.
Graciñas e un saúdo a todos, vémonos o 24!
Estimados todos:
Visto que nin o ano nin nós chegamos á fin o día 21 e que a previsión actual é rematarmos o 2012 engulindo uvas a contrarreloxo como de costume, dende a Casa temos unha proposta que facer: algúns teredes plans xa pechados (saír no centro da vosa cidade, ficar tranquilos na casa), pero seguro que outros moitos, por aquilo de que a Noitevella non deixa de ser unha rutina e de que tampouco hai nada novo baixo o sol, non vos quixestes preocupar de ter que tomar unha decisión concreta para a “madrugada M”.
Isto, ao mellor, interésavos.
Nós, que non temos maior expectativa que a de estar cómodos e pasalo ben trasnoitando, imos facer festa. A única programación que temos é estar de bo humor, pasar o tempo con amigos e garantir que non se van sufrir empurróns nin faltas de respeto por parte de ninguén; parécenos suficiente. O resto poñédelo vós. Podedes montar a vosa propia festa, coma na casa, pero sen o perigo de molestar aos veciños nin a preguiza de ter que recoller ao día seguinte.
O único do que nos temos que preocupar é de vos prover bebida suficiente, manter cubertos os gastos do local e ofrecer un servizo axeitado, de tal modo que imos establecer unha cuota de 20 euros por persoa con barra libre, desexablemente a recadar por anticipado. Sabemos que o prazo con que avisamos é un pouco xusto para isto e pedímosvos desculpas, pero nunha semana pódese facer. Para apuntarvos e formalizar o pago podedes poñervos en contacto polos medios tradicionais, a través do Facebook ou falando directamente con calquera de nós se nos tedes a man, e así concretar a forma de pago que máis vos convén (en man, ingreso, etc.).
Horario: comezo ás 02:00h. e remate ás 07:00h.
Extras: chocolate con biscoitos.
NOTA: Os que saibades tocar un instumento non vos privedes de traelo.
Felices festas a todas e a todos.
A Casa de Ana 